Lettre de Charles Quint
Traduction :
DE PAR L’EMPEREUR.
A NOS CHIERS ET BIEN AMEZ LES DEPUTEZ ET COMMIS DES TROIS ESTAS DE NOSTRE CONTÉ D’ARTHOIS, salut. Comme nagueres, a nostre requeste, avez accordé le nombre de deux mil pyonniers pour assister a la demolition de la ville et fortresse de Therouenne, laquelle, avecq la grace de Dieu, avons reduict en nostre obeyssance; et, pour cest effect, il vous soit besoing de sonner le tamburin pour amasser et lever lesdicts pyonniers, SAVOIR FAISONS que nous, desirans l’acceleration et achevement de ladicte demolition, vous avons consenty et parmis, consentons et parmectons, en vous donnant congié par cestes, de povoir sonner ou par voz deputez et commis faire sonner le tamburin par tout nostre dict pays et conté d’Arthois es lieux les plus peuplez et la ou bon vous semblera, d’enroller et lever tous mainouvriers quy besoigner et assister vouidront ausdict demolissement de Therouvenne, les passer a monstre et avoir la superintendence et conduicte d’iceulx, vous donnant en oultre povoir de commectre aucuns personnaiges ydoines pour par lesdicts pyonniers et autrement conduire, chasser et avancher ledict ouvraige a l’advis et soubz l’ordonnance des s de Morbeque et d’Echoute, par nous commis au fait de ladicte demolition. Lesqueiz voz deputez auront telle auctorité et puissance sur lesdicts pyonniers que capitaines de gens de pied ont sur les souldars de leur charge, mesmes de, au bien et effect de leurs ouvraiges, leur imposer telles paines, loix et amendes que besoing sera et se trouvera convenir ; leur declairant et asseurant de nostre part qu’ilz ne seront enploiez en autre ouvraige fort cellui que dessus, ne aussy menez plus avant. De faire ce que dessus et ce qu’en deppend vous donnons et a vos dicts deputez, comme dit est, povoir et mandement especial, mandant a tous nos justiciers, officiers et subgectz que, en ce faisant, ilz vous obeyssent et entendent diigamment. Car tel est nostre plaisir. Donné en nostre ville de Bruxelles, soubz nostre contreseel icy mis en placcart, le unzieme jour de juillet, l’an )(VC cincquante trois.
Par l’empereur, (Sceau)
(Signé : ) V. Laugheres
